Pinjar - پنجر

تقسیم پر بہت کچھ لکھا گیا ہے لیکن پنجر کی منفرد بات یہ ہے کہ اس میں تقسیم کو مذہب سے ہٹ کر عورت کی نظر سے دکھایا گیا ہے. ایک نئی نظر سے تقسیم کے دُکھ کو بیان کیا گیا ہے. ایک ایک سطر ایک سانحہ ہے. کردار کے دُکھ اور احساسات کو آپ اپنے اندر محسوس کرتے ہیں. کہنے کو تو کہانی پارو اور رشید کی ہے مگر کہانی میں ہر طرح پارو کا دکھ ہے، اس کے جذبات ہیں اس کے احساسات ہیں.

ایک بے بس عورت کی کہانی… امرتاپریتم کی زبانی… عورت جو انتقام کا شکار ہوئی، جو اپنے بیٹے کو ماں کا پیار نہ دے سکی… ساری عمر اپنے گھر، اپنے کنبے اور اپنے منگیتر کو نہ بھلا سکی… اس نے تقسیم کی خوں ریزی میں خود کو خطرے میں ڈالا اور دوسری عورتوں کی عصمت و عفت کی حفاظت کی… لیکن خود اپنے کنبے، اپنی عزت کے گہوارے سے دُور رہی۔